RAMENY PINY: Jalar Kom Bura ma Alego-Usonga Ogoyo Bade Piny, Jodak ma-Awelo koro Nyalo Buonjo

Jalar Kom Bura ma Alego-Usonga Ogoyo Bade Piny

Rawera moro mayande hedhore ni dwaro laro kom Alego-Usonga koro wachore ni ogoyo bade piny bang timo kampen motwere kuom dweye angwen mokalo kotiyo gi pesa matamore gi nono.

Rawerano mayande itayo gi mbesene e ngado paro wachore ni notiyo gi Million Angwen e dweye angwen kodwaro piny en kende ma onge ng’ato malaro kode.

Mopogore gi gero udi kod keto fuel ne jo-bodaboda rawerano yande chiwo pesa aching ne ng’ato angata mobuonjo kode.

Weche ne ochako dhine marach ka ne gach japuonj moro mabende en apisa midewo e riwruok mar jopuonj (KNUT) bade ma-Siaya oyudo aksdent e chiro Mwer koting’o joge majogo-oporo.

ADVERTISEMENT

Gach japuonj Peter Wanyang e dho tesen mar obila ma Siaya. Pichani wayudo e WhatsApp

Wachore ni advisa mage ne owuonde ni kik ochul pes repair mar garino (KES 25,000) mabende nyaka sani obanjore miwuoro oko mar tesen mar obila ma Siaya. Achiel kuom ji adek mane garino otuomo ka ni e tuktuk sani ni gi ng’ol ma pamanent.

To nikech jatend jopuonjno ni gi tudruok malach gi jo-siasa ma Siaya osebed kigoyo rawerano gi wachno machop kama koro dhano ochich gi yore rawerano mag yudo omenda.

Wachore ni oloko ohala mag geche yo nam chumbi kod weche mag kliaring-and-fowading to kiawa! Dhano koro obedo akicha gi pesa mayande ichiwo ao-yayeno.

Jodak ma-Awelo koro Nyalo Buonjo

Jodak e kar jot ma Awelo Estet e i Siaya town koro nyalo buonjo, bang Gavna Orengo timo romo gi jotend Harambee SACCO mageto gero udi manengogi ofuon’gore e bwo Affordable Housing Program.

Oseket tenge loo madirom 5.6 hectares ne chenrono ma bende dhi chako machiegni.

Gavna James Aggrey Bob Orengo (diere) kane otimo romo gi apisa madongo mag Harambee SACCO. Pichani ogo gi Diblo, Siaya Governor’s Press Unit

Kane otimo romo gi CEO mar Harambee SACCO migosi laktar George Ochiri, Gavna Orengo nowacho ni arita gi yore mag tudruok koriwo nderni gi intanet bende dhi idho okang mamalo seche ma udigo oger.

Awelo en achiel kuom kuonde jot madongo e taun ma Siaya to yande weche arita kwe rach kuno moloyo.